एमाले जुम्लाका उपाध्यक्षविरुद्ध बालयौन दुर्व्यवहारको आरोप, जाहेरी दर्ता
सुर्खेत । नेकपा एमालेका जुम्ला जिल्ला कमिटी उपाध्यक्ष सुरतबहादुर शाहीमाथि बालयौन दुर्व्यवहारको आरोप लागेको छ । शाहीले तातोपानीकी एक किशोरीलाई यौन प्रस्ताव गरेको अडियो सामाजिक सञ्जालमा भाइरल भएको छ ।
अडियोमा उनले किशोरीलाई फकाएको र प्रलोभनमा पारेको सुनिन्छ । उक्त विषय यतिबेला प्रहरी समक्ष पुगेको छ । शाहीविरुद्ध १७ वर्षीय किशोरीमाथि यौन दुर्व्यवहारको आरोपमा जाहेरी दर्ता भएको जुम्ला प्रहरीले जनाएको छ ।
मंगलबार दर्ता भएको जाहेरीका आधारमा बालबालिका विरुद्धको कसुरमा प्रहरीले आवश्यक कारबाही प्रारम्भ गरेको छ । पीडित किशोरीका बुबाले बालबालिका सम्बन्धी ऐन २०७५ को दफा ६६ बमोजिम जाहेरी दिएका छन् ।
जिल्ला प्रहरी कार्यालय जुम्लाका सूचना अधिकारी उमेश चन्दका अनुसार उक्त विषयबारे थप अनुसन्धान भइरहेको छ ।
के छ अडियोमा ?
भाइरल अडियोमा शाहीले किशोरीलाई प्रवेश परीक्षामा नाम निकालिदिने, पढाइदिने, ट्युसन खर्च आफैँ बेहोरिदिने र बदलामा समवेदनशील अङ्गको फोटो पठाउनुपर्ने र यौन सम्बन्ध राख्न दिनुपर्ने लगायतका कुरा गरेको सुनिन्छ । अडियोमा उनले भनेका छन्, ‘म धेरै लामो कुरा गर्ने पक्षमा छैन, हँ पढ्ने कुरा सबै फिक्स गरेको छु, यो कुरा बाहिर कहीँ पनि नभन्नू ।’
त्यसपछि उनले ‘मैले मागेको कुरा दिन्छौँ नि !’ भनेर यौन प्रस्ताव गरेका छन् । उनले समवेदनशील अङ्गको फोटो पठाइदिन समेत प्रस्ताव गरेका छन् । यो विषयमा उपाध्यक्ष शाहीको प्रतिक्रिया लिन खोज्दा उनी फोन सम्पर्कमा आएनन् । एमाले जुम्ला अध्यक्ष शान्तिलाल महतले पार्टीको बैठक बसेर धारणा बनाइने बताए ।
उनले प्रदेश सरकारको संयन्त्र प्रयोग गरेर मुद्दा दर्ता गरिएको बताए । यद्यपि उपाध्यक्ष शाही आफ्नो सम्पर्कमा नरहेको उनको भनाइ छ । महतले यस प्रकरणको अर्को पनि अडियो रहेको र आफूले सुनेको बताए । उक्त अडियोमा किशोरीले प्लान गरेर फसाउन खोजिएको सन्देशसहितको कुरा रहेको र उपाध्यक्ष शाहीको समेत कमजोरी रहेको उनको भनाइ छ ।
