ट्रम्पका वरिष्ठ सहयोगी र ट्रम्प जुनियरसँगको बैठकमा रुसी अधिकारी पनि भएको खुलासा
एजेन्सी । अमेरिकी राष्ट्रपति डोनाल्ड ट्रम्पका वरिष्ठ सहयोगी र ट्रम्प जुनियरसँग अघिल्लो वर्ष न्युयोर्कमा भएको एउटा बैठकमा एक जना पूर्व सोभियत गुप्तचर अधिकारीपनि सहभागी रहेको खुलासा भएको छ । बैठकमा ट्रम्पका ज्वाईँ ज्यारेड कुश्नर र चुनावी अभियानका अध्यक्ष पल म्यानफोर्टपनि सहभागी थिए ।
ट्रम्पको चुनावी अभियानका सहयोगी र रुसी व्यक्तिबीच भएका गैर कुटनीतिक सम्वादको अहिलेसम्म प्राप्त सबैभन्दा बलियो प्रमाणका रुपमा उक्त बैठकलाई लिइएको छ । बिहीबार पेरिसमा आयोजित पत्रकार सम्मेलनमा राष्ट्रपति ट्रम्पले अधिकांश व्यक्तिले उक्त भेटवार्तालाई स्वीकार गर्ने उल्लेख गरेपनि अपेक्षित उपलब्धी हात नलागेको बताए ।
सो भेटमा सहभागी भएका भनिएका रिनाट अख्मेटसिनले आफूले गुप्तचर हेर्ने रुसी सैनिक इकाइमा काम गरेको स्विकार गरेका छन् । सन् २०१५ मा वाशिङटन डीसीको एउटा अदालतमा दायर मुद्दामा खानीसम्बन्धी कम्पनीले आफ्ना निजी अभिलेखहरुलाई ह्याक गर्न खोजेको आरोप उनीविरुद्ध लगाएको थियो । खानी सम्बन्धी एउटा कम्पनीले अख्मेटशीनलाई लण्डनसम्म पछ्याउन एक जना निजी जाँचकर्ता नै खटाएको थियो ।
अख्मेटशीनले ट्रम्प टावरमा भएको बैठकमा आफू सहभागी भएको पनि बताएका छन् । अदालतको दस्तावेजमा उनले साइबर हमाला गर्ने योजना बुनेको आरोप लगाइएपनि त्यसलाई उनले अस्वीकार गरेका छन् । क्रेमलिनका प्रवक्ताले अख्मेटशीनको बारेमा रुसी सरकारलाई केहीपनि थाहा नभएको बताएको छ ।
