गोर्खाल्याण्डको समर्थनमा लण्डनमा प्रदर्शन
एजेन्सी । भारतको दार्जीलिङ क्षेत्रमा छुट्टै गोर्खाल्याण्ड राज्यको माग गर्दै आह्वान गरिएको आम हडतालको समर्थनमा बेलायतमा प्रदर्शन गरिएको छ । दार्जीलिङ तथा आसपासका क्षेत्रबाट आएर बेलायतमा बसोबास गरिरहेका नेपाली भाषी समुदायले भारत सरकारलाई गोर्खाल्याण्डको माग पुरा गर्न आह्वान गर्दै प्रदर्शन गरेका हुन् ।
शुक्रबार बिहान लण्डनको एल्डविचस्थित भारतीय उच्चायुक्तको कार्यालयबाहिर भारतिय नेपाली भाषी समुदायका मानिसहरु भेला भएका थिए । उनीहरुले पश्चिम बङ्गाल राज्य सरकारले नेपाली भाषी समुदायमाथि दमन गरिरहेको भन्दै त्यस्तो दमन रोक्न माग गरिएका प्लेकार्डहरु पनि बोकेका थिए ।
दार्जीलिङमा जारी आम हडताल एक महिना पुग्दा पनि भारत सरकारले त्यसको सुनुवाइ नगरेको भन्दै उनीहरुले आक्रोश व्यक्त गरे । बेलायती सेनाका सेवानिवृत्त मेजर टिकेन्द्रदल देवानले गोर्खाल्याण्डको माग चीनसँग सरोकार नभएको तथा नेपालले समेत यसलाई वेवास्ता गरेको बताए ।
