एउटै गाउँका १४५ जनाको पाठेघरको जाँच गर्दा २६ जनामा पाठेघरको क्यान्सर

सुर्खेत : जाजरकोटको नलगाड नगरपालिका–६ भारगाउँमा १४५ जना महिलाको पाठेघरको जाँच गर्दा २६ जनामा पाठेघरको क्यान्सर देखिएको छ । छिताराम स्मृति प्रतिष्ठान र नलगाड नगरपालिकाले संयुक्त आयोजना गरेको निःशुल्क स्वास्थ्य शिविरमा २६ जना पाठेघरको मुखमा क्यान्सर भएका बिरामी फेला परेका हुन् ।
शिविरमा पाठेघरको मुखको क्यान्सर भएकामध्ये पहिलो चरणका १७ जना, दोस्रो चरणका ४ जना र उपचार गर्न ढिलाइ भइसकेका ५ जना रहेको चितवन भरतपुर क्यान्सर अस्पतालका डा. माधव विश्वकर्माले बताए । ‘पाठेघरको मुखको क्यान्सर परीक्षण गरिएका १४ वर्षदेखि ५५ वर्ष उमेर समूहका १ सय १५ जनामध्ये भारगाउँका २६ महिलामा पाठेघरको मुखमा क्यान्सर देखा परेको छ ।’ उनले भने,‘सानै उमेरमा विवाह र सन्तान जन्माउने, चिकित्सकको सल्लाहबिना गर्भपतनका औषधिको प्रयोग, यौनांगको सरसफाइको कमी, कुपोषणलगायतका कारण पाठेघरको मुखमा क्यान्सर देखा परेको हो ।’
२ दिनेसम्म चलेको शिविरमा २२६ विद्यार्थीसहित ८१५ जनाको स्वास्थ्य परीक्षण गरिएकामा ४३ महिलाको पाठेघर खसेको फेला परेको डा.विश्वकर्माले बताए