नेकपा (माओवादी केन्द्र) ले पार्टीका सदस्यहरूबाट प्रति एक सय रुपैयाँ लिने भएको छ
सुर्खेत, जेठ २५ :नेकपा माओवादी केन्द्रले पार्टीको केन्द्रीय कार्यालयको व्यवस्थापन र अन्य रचनात्मक काम गर्न कोष सङ्कलन गर्ने उद्देश्यले प्रत्येक पार्टीका सदस्यबाट एक सय रुपैयाँ शुल्क लिने भएको छ ।
देशभरका आठ लाख दलका सदस्यबाट आठ करोड रुपैयाँ सङ्कलन हुने अपेक्षा गरिएको छ । आइतबार पार्टी अध्यक्ष पुष्पकमल दाहालको निवास खुमलटारमा बसेको पूर्व स्थायी समिति सदस्यहरुको बैठकले यस्तो निर्णय गरेको हो ।
बैठकमा समसामयिक राजनीतिक मुद्दा, भर्खरै सम्पन्न स्थानीय निर्वाचन र पार्टीका भातृ संगठन भित्रको केही असन्तुष्टिका विषयमा छलफल भएको माओवादी केन्द्रका नेता हरिबोल गजुरेलले जानकारी दिए ।
पार्टीको आठौं महाधिवेशन पाँच महिनाअघि सकिए पनि पदाधिकारी छनोट गर्न सकेको छैन । बैठकमा यो विषयमा पनि छलफल भएको थियो । माओवादी केन्द्रले संघ र प्रदेश सभाको निर्वाचन र पार्टीका पदाधिकारी मनोनयनपछि पार्टी विस्तारमा केन्द्रित हुने जनाएको छ ।
