लोडसेडिङ कम गर्न सुर्खेतमा छड्के जाँच सुरु
सुर्खेत । लोडसेडिङबाट आक्रान्त जनतालाई राहत दिन सुर्खेतमा पनि छड्के जाँच गरिने भएको छ । विभिन्न तरिकाबाट स्थानीय स्तरबाटै विद्युतको छुहावट हुने र साँझको समयमा पनि स्थानीय उद्योग, कलकारखानाले विद्युत खपत गरिरहने हुँदा त्यसको चड्के चेकजाँच सुरु गरिएको हो ।
उर्जा मन्त्रालयबाटै नेपाल विद्युत प्राधिकरण, सुर्खेत वितरण केन्द्रलाई विद्युत चुहावट नियन्त्रण गर्न परिपत्र आएपछि सुर्खेत वितरण केन्द्रले पनि छड्के चेकजाँच सुरु गर्न लागेको हो । केन्द्य्रको परिपत्र अनुसार स्थानीय स्तरमा विद्युत चुहावटलाई १६ प्रतिशतमा झार्न निर्देशन दिइएको छ । तर सुर्खेतमा करिब १६ देखि १७ प्रतिशत नै विद्युत चुहावट भएकोले त्यो भन्दा पनि तल झार्ने लक्ष्यका साथ निरन्तर प्रयास गरिएको नेपाल विद्युत प्राधिकरण सुर्खेत वितरण केन्द्रका प्रमुख दिपकजंग चौधरीले जानकारी दिए ।
अहिले खासगरी उर्जा मन्त्री जनार्दन शर्माले देशैभर लोडसेडिङ शुन्यमा झार्ने लक्ष्यका साथ काम सुरु गरेको र सबै तह र निकायमा पनि सोही अनुसार निर्देशन दिएकोले सुर्खेतमा पनि यो कामको सुरु गरिएको हो । जिल्लामा संचालन भइरहेका जलविद्युत आयोजनाहरुलाई छिटो सम्पन्न गरेर जनतालाई उज्यालो दिन र चुहावटलाई पनि कम गर्दै आवश्यकताका आधारमा विद्युत वितरण गर्न उर्जा मन्त्रालयले जनविद्युतमा जनताको लगानीको नारा समेत अगाडि ल्याएको छ ।
सुर्खेतमा तत्काल सम्पन्न हुने आयोजनाहरु नभएपछि चुहावट र आवश्यक भन्दा बढी विद्युत खपत गर्ने तथा चोरी गर्नेहरुलाई छड्के जाँच गर्न लागिएको छ । यसले पनि लोडसेडिङ घटाउन मदत् गर्ने केन्द्रका प्रमुख चौधरीले बताए । ‘‘सुर्खेतमा केही काम निरन्तर चलिरहेकाछन्, अरु भन्दा पनि चुहावट नियन्त्रणलाई ध्यानमा राखेर हामीले अहिले छड्के जाँच पनि सुरु गरेका छौं,’ प्रमुख चौधरीले भने–‘हामी मिटर चेक गर्ने, लाईन चेक गर्ने काम पनि गरिरहेका छौ, यसले पनि केही फाइदा हुन्छ ।’’
साँझको समयमा सुर्खेतमा पनि बढी विद्युत खपत हुने भएकोले यो समयमा सञ्चालन हुने उद्योगहरुको पनि छड्के जाँच गर्ने केन्द्रले जनाएको छ । नियमित विद्युत आइरहेको वेला खासै समस्या नभएपछि पावर नपुग्दा, विद्युत अनियमित हुँदा साँझको समयमा उद्योग सञ्चालन हुँदा जनता अँध्यारोमा बस्नुपर्ने भएकोले त्यस्ता उद्योगहरुको पनि चेक हुने जनाइएको छ । पहिलो पटक चेकजाँचका क्रममा साँझमा पनि विद्युत खपत गरिरहेको पाइएमा सचेत गराउने र अर्काे पटकमा कार्वाही समेत गरिने केन्द्रका प्रमुख चौधरीको भनाई छ ।
आफूहरुले निरन्तर यस्ता काम गररहेको भएपनि केन्द्य्रबाटै परिपत्र आएकोले यसलाई पनि विशेष रुपमा लिइएको उनको भनाई छ ।
सुर्खेतमा साना उद्योग कमै रहेकोले यो समस्या पनि कमै रहेको छ । तर केही ग्रिल उद्योग, स–मिल लगायतका उद्योगहरु हुने भएकोले तिनिहरुको चेकजाँच गरिने उनले बताए । स्थानीय स–मिलले साँझको समयमा कमै काम गर्ने गरेको ले यो समस्या पनि कमै हुने गरेको चौधरीले बताए । तर अनुगमन र चेकजाँचलाई भने निरन्तरता दिने उनको भनाई छ ।
यस्तै लकार्यालयले बक्यौता रकम बाँकी रहेका कार्यालय, संघसंस्थाहरु लगायतबाट पनि बक्यौता रकम भुक्तानिका लागि निरन्तर ताकेता गरिरहेको जनाएको छ । सुर्खेतमा ठुलो बक्यौता रकम खासै नरहेको भन्द्यै उनले निरन्तर रुपमा यो काम गरिरहेकोले समस्या नभएको बताए ।
‘‘बक्यौता रकम भुक्तानिको काम निरन्तर भइनै रहेको छ,’ उनले भने–‘अहिले सुर्र्खेतमा खासै यसको समस्या छैन, ठुलो रकम पनि बाँकी छैन, काम पनि निरन्तर भइरहेको छ ।’’
