प्याज विक्रि नभएपछि किसानहरु चिन्तित
सल्यान – सल्यानको देवस्थल गाविस–१ नाम्रामा बिगत ५ महिनादेखि बिक्री नहँदा ६० क्युनटल प्याज घरमै थन्किएको छ ।
बैशाखको अन्तिम साता बारिबाट निकालेर राखिएको प्याज अझै ६० क्वीन्टल भन्दा धेरै विक्रि नभएर सड्ने अवस्थामा रहेको बताइएको छ । गाउँमा जम्मा ५० घर धुरीले करिब एक सय ५० क्युनटल प्याज उत्पादन गरेकोमा करिब एक सय क्वीन्टल प्याज मात्रै विक्रि भएको स्थानीयको भनाई छ ।
बजार नपाउँदा प्याज थन्किएको स्थानीयले बताएका छन् । प्याज प्रति के जि रु ३० रुपैयाँले बिक्री गर्दा पनि बिक्री हुन नसकेको हो । बिक्री हुन नसक्नुको कारण भारतीय बजारसंग प्रतिशप्रर्धा गर्न नसक्नु भारतीय प्याज बजारमा प्रति के जि २५ रुपैयाँमा भित्रिनु,सडक, यातायातको सुबिधा नहुनु भएको स्थानीय रविराज शर्माले बताए ।
भण्डारको समेत समस्या भएको र आफूहरुले उत्पादन गरेको प्याज २५ रुपैयाँमा दिदा मेहेनत खर्च नआउने भएकाले आफूहरुले कम मूल्यमा विक्री गर्न नसकेको स्थानीय शिक्षक रामप्रसाद शर्माले बताए । स्थानीय रविराजले अहिलेसम्म विक्रि गरेको भनिएको प्याज पनि धान र गहुँ सँग साटासाट गरेको र केही मात्रै नगदमा बिक्री गरेको बताए ।
प्याज बिक्री गर्न आफैले बोकेर छिमेकी जिल्लासुर्खेतका गाविस राकम, काप्रीचौर, आग्रिगाउँ,घोरेटा, बजेटिचौर र जाजरकोट तथा सल्यानका गाउँमा लैजानु पर्ने बाध्यता रहेको अर्का किसना बीरबल पोखरेलले बताए ।
