हुम्लामा आँखा शिविर
हुम्ला। हुम्ला जिल्लामा आँखा शिविर सम्पन्न भएको छ । कर्णाली प्रदेशको सामाजिक विकास मन्त्रालयको आर्थिक सहयोग र नेपाल रेडक्रस सोसाइटी, सुर्खेत आँखा अस्पतालको प्राविधिक सहयोगमा सप्ताहव्यापी आँखा शिविर सम्पन्न भएको सुर्खेत आँखा अस्पतालका
व्यवस्थापक घन थापाले जानकारी दिए ।
उनका अनुसार शिविर असार ८ गतेदेखि १५ गतेसम्म सञ्चालन गरिएको थियो ।
हुम्ला जिल्लाको पिललाङ, सर्केगाड र सिमिकोटमा आँखा शिविर सम्पन्न भएको हो भने उक्त शिविरबाट १ हजार ३ सय ३३ नागरिकहरुले निःशुल्क आँखा उपचार सेवा पाएका छन् । त्यस्तै, १ सय ७ जना मोतिबिन्दूका बिरामीहरुले अपरेशन सेवा प्राप्त गरेका थिए ।
शिविरबाट ४ सय जनाले विशेषज्ञको सिफारिसअनुसार नजिक लेखपढ गर्ने चश्मा निःशुल्क वितरण गरिएको व्यवस्थापक थापाले जानकारी दिए ।
आँखा शिविर सम्पन्न गर्न पिललाङ, सर्केगाड र सिमिकोट स्थानीय तह, जिल्ला अस्पताल र नेपाल रेडक्रस जिल्ला शाखा, हुम्लाले सहयोग गरेको थियो ।
शिविरमा सुर्खेत आँखा अस्पतालको
नेत्र विशेषज्ञ डा. शक्तिप्रसाद सुवेदी सहितको प्राविधिक टिम र मन्त्रालयका कर्मचारीको सहभागिता रहेको थियो ।
