पहिलो घर नै असुरक्षित, कसले दिने ध्यान ?
सुर्खेत, चैत ८ । हरेक मान्छेका लागि पहिलो घर आफ्नी आमाको पाठेघर हो । हरेक मान्छे त्यही पाठेघरमा ९ महिना विताएर धर्तीमा जन्म लिन्छन । तर मान्छेको त्यही पहिलो घर असुरक्षित हुने क्रम बढेको छ ।
देशभर पाठेघर खस्ने समस्याले विकराल रुप लिइरहेको छ । सुर्खेतमा पनि पाठेघर खस्ने महिलाहरुको संख्या बढेको छ । केही गाउँविकास समितिहरुमा गरिएको सर्वेक्षण अनुसार ४२ प्रतिशत महिलाहरुको पाठेघर खस्ने (आङखस्ने) समस्या रहेको छ ।
सीमान्तकृत महिलाहरुका लागि महिला संस्था (वाम) ले संचालन गरेको महिला किशोरी तथा बालअधिकार कार्यक्रम अन्तर्गत सोमबार वीरेन्द्रनगरमा आयोजना गरेको पत्रकारहरुसंगको अन्तरक्रिया कार्यक्रममा यस्तो जानकारी दिइएको हो । कार्यक्रममा बालविवाह तथा पाठेघर खस्ने समस्याका बारेमा जानकारी दिदै केडका अरुणा चौधरीले पहिलो घरका रुपमा रहेको पाठेघर दिनानुदिन असुरक्षित हुँदै गएता पनि सरोकारवालाहरु गम्भीर नभएको बताइन ।
खाङ खस्ने समस्या भएपछि महिलाहरुले नरकीय जीवन विताउन बाध्य हुनुपरेको भन्दै चौधरीले बालविवाह, सानो उमेरमा बच्चा जन्माउने, धेरै बच्चा जन्माउने प्रचलनको अन्त्य गर्न सबैले भूमिका निर्वाह गर्नुपर्ने बताइन । भर्गपतन गर्ने प्रचलन बढेकोले पनि यो समस्या बढेको उनको भनाई छ । आङ खस्ने समस्या भएपछि परिवारले पनि वास्था नगर्ने र आफ्नै सन्तानबाट समेत अपहेलिन हुनुपर्ने समस्या भएको बताइन ।
यस्तै कार्यक्रममा केड सुर्खेतका कार्यक्रम संयोजक सुमेश भट्टराईले बालविवाहका कारणले पनि आङ खस्ने समस्या बढेकाले बालविवाह न्यूनिकरणका लागि पनि सबै सरोकारवालाहरुले ध्यान दिनुपर्ने वेला भएको बताए । सामाजिक संस्कार, धार्मिक परम्परा, किशोरकिशोरीमा शिक्षाको अभाव, अन्धविश्वास लगायतका कारणले बालविवाह हुने गरेको भन्दै यस्ता संस्कारहरुको अन्त्य गर्नुपर्ने बताए ।
कार्यक्रममा केड कै रामविक्रम शाहले पनि यो समस्या विकराल हुँदै गएकोले सबैले सवालको रुपमा उठाउनुपर्ने बताए । कार्यक्रममा पत्रकार महासंघ सुर्खेतका अध्यक्ष गणेशकञ्चन भारतीले महिलाको पाठेघर खस्ने समस्या समाधानका लागि सरकार र सबै सरोकारवालाहरुलाई सचेत गराउने काम पत्रकारहरुले गरिरहेको भन्दै आगामी दिनमा पनि यस्ता सवाललाइ प्राथमिकता दिइरहने बताए । कार्यक्रम वास सुर्खेतका अध्यक्ष यमुना नेपालीको अध्यक्षतामा भएको हो ।
