ऊर्जामन्त्रीले भने-अब देशभर लोडसेडिङकाे अन्त्य

सन्धीखर्क ।ऊर्जामन्त्री जर्नादश शर्मा ‘प्रभाकर’ले देशभर लोडसेडिङको अन्त्य गर्ने तयारीमा भइरहेको बताएका छन् ।बिहीबार अर्घाखाँची महोत्सवको सन्धीखर्कमा उद्घाटन गर्दै ऊर्जामन्त्री प्रभाकरले ‘अब देशभर नै लोडसेडिङ अन्त्य गर्ने तयारीमा ऊर्जामन्त्रालय लागिरहेको छ । थप उत्पादन र वितरणको कामलाई पनि सँगसँगै लगिने छ’ भने ।

कार्यक्रममा बोल्दै मन्त्री प्रभाकरले अर्घाखाँचीको सिमानामा रहेको नौमुरे परियोजना छिट्टै सञ्चालन हुनेगरी काम भईरहेको जानकारी समेत दिँदै पश्चिम सेती, नरसिङगाढ, शारदा, उत्तरगंगा, अरुण तमोर, बुढिगण्डकीलगायतका जलविद्युत परियोजना अगाडि बढेको बताए ।

एक अर्को प्रसंगमा बोल्दै मन्त्री प्रभाकरले संशोधन विधेयकलाई व्यवस्थापिका संसदमा मतदानको प्रकृयाबाट टुंगो लगाई चाँडै निर्वाचनको मिति तोक्न एमालेसँग सहमति भएको बताए । ‘सरकार सबै दलहरुबीच एउटा सहमति बनाएर अगाडि बढेको छ र अहिलेको अलमल चाँडै हट्छ’ उनले भने ।

Source  onlinedabali.com