नयाँ जिसिअका नयाँ योजना
विद्यार्थी टिकाउने योजनादेखि शैक्षिक अन्तरक्रियासम्म
सुर्खेत, ।यही कात्तिकमा जिल्ला शिक्षा कार्यालय सुर्खेतमा सरुवा भएर आएका जिल्ला शिक्षा अधिकारी जितबहादुर शाहले आफ्नो केही शैक्षिक योजनाहरु सार्वजनिक गरेका छन् ।
जिल्ला स्थिति पत्रकारहरुसंग परिचयात्मक कार्यक्रमको आयोजना गरी जिल्ला शिक्षा अधिकारी शाहले केही योजनाहरु सार्वजनिक गरेका हुन् ।
सुर्खेत जिल्लाको शैक्षिक अवस्थालाई अझ गुणस्तरीय बनाउनका लागि भन्दै शाहले नयाँ योजनाहरु सार्वजनिक गरेका छन् ।
तत्काललाई केही योजनाहरु कार्यान्वयन गर्ने र बाँकी योजना तथा कार्यक्रमहरु सल्लाहा सुझावका आधारमा निर्माण गरी कार्यान्वयन गरिने शाहले बताएका छन ।
जिल्ला शिक्षा कार्यालयले अब समग्र जिल्लाको शिक्षा योजना बनाउने र सोही योजना अनुसार काम गर्ने छ ।
साथै कार्यालयको काम गर्न सहजहोस भन्ने हेतुले सबै कर्मचारीहरुको कार्यविभाजन पनि गरिएको छ । यसले गर्दा सेवाग्राहीलाई पनि सहज हुने उनले बताए ।
तत्काल नै जिल्ला शिक्षा कार्यालय सुर्खेतले शैक्षिक अन्तरक्रिया कार्यक्रमलाई व्यापाक बनाउने भएको छ ।
शैक्षिक गुणस्तर बढाउनका लागि अब शिक्षक,विद्यार्थीहरु र अभिभावकहरुबीच अन्तरक्रिया कार्यक्रम संचालन गरिने जिल्ला जिल्ला शिक्षा अधिकारी शाहले बताए ।
जसबाट कम्जोरी पत्ता लाग्ने र जसको कम्जोरी हो उसले कम्जोर सुधार गर्ने हुँदा शैक्षिक गुणस्तर बढ्ने उनले बताए ।
यसले गर्दा विद्यार्थीहरु आफैले योजना बनाएर पढ्ने वातावरणको पनि सिर्जना हुने उनको भनाई छ।
‘‘शैक्षिक गुणस्तरका लागि शैक्षिक अन्तरक्रिया कार्यक्रम सुरु गछौं,’ उनले भने–‘शिक्षक,अभिभावक र विद्यार्थीहरुबीच हुने अन्तरक्रियाबाट कम्जोरी कस्को हो भन्ने पत्ता लाग्छ,यसले विद्यालय तहको शिक्षा सुधार गर्न सहज हुनेछ ।’’
यस्तै तत्कालका लागि आफूले जिल्ला शिक्षा कार्यालयलाई सेवाग्राही मैत्री बनाउने उनले सुनाए ।
अहिले जिल्ला शिक्षा अधिकारीको कार्यकक्षा तेस्रो तलामा रहेको भन्दै उनले मंसिर महिनाभित्र यसलाई अपाङगता मैत्री बनाउने बताए ।
हरेक सेवालाई मैत्री पूर्ण बनाउने भन्दै उनले सेवाग्राहीलाई सन्तुष्ट बनाउने प्रतिबद्धता जनाए ।
पत्रकारहरुसंगको कार्यक्रममा बोल्दै जिल्ला शिक्षा अधिकारी शाहले मंसिर महिनाको मसान्तसम्म विद्यालय व्यवस्थापन समितिको गठन गरिसक्न सबै विद्यालयलाई निर्देशन पनि दिएका छन् ।
मंसिर मसान्तसम्म विद्यालय व्यवस्थापन समिति गठन नभए सेवा सुविधाबाट बञ्चित गरिने भन्दै उनले तत्काल गठन गर्ने निर्देशन दिएका हन् ।
यस्तै प्रावि तहका विद्यार्थीहरुलाई मायाप्रीतिका गीतहरु गाउन लगाउने र त्यस्तै गीतमा नाच्न सिकाउने प्रबृत्तीको अन्त्य गर्ने योजना बनाएको उनले बताए ।
विशेष गरी बोर्डिङ स्कुलहरुमा साना बालबालिकाहरुलाई पनि यस्ता गीतमा मा नाच्न लगाउने हुँदा त्यसले नकरात्मक प्रभाव पार्ने भन्दै उनले यसलाई निरुत्साहित गर्ने बताए ।
यसका लागि त्यसो नगराउने निर्देशन दिनुका साथै त्यस्ता कार्यक्रममा सहभागी नै नहुने योजना बनाएको उनको भनाई छ ।
उनले नैतिक शिक्षा र अनुशासनलाई पनि विद्यालय शिक्षामा जोड दिनुपर्ने भन्दै त्यसतर्फ पनि ध्यान दिन विद्यालयका शिक्षकहरुलाई ध्यानाकर्षण गराउने बताएका छन् ।
यस्तै करार शिक्षकहरु नियुक्त गर्दा हुने चलखेललाई रोक्ने, विभिन्न बाहानामा शैक्षिक शुल्क असुल्ने सामुदायिक विद्यालयहरु र मनोमानी रुपमा संचालन भएका निजी स्कुलहरुलाई पनि व्यवस्थित गरिने शाहको भनाई छ ।
पत्रकारहरुले पनि नयाँ जिसिअ शाहलाई जिल्लाको शैक्षिक गुणस्तर बृद्धि गर्नुका साथै शैक्षिक समस्याहरुको समाधान गर्नका लागि साथ दिन भन्दै यहाँका समस्याका बारेमा जानकारी गराएका थिए ।
नेपाल पत्रकार महासंघ सुर्खेतका अध्यक्ष गणेशकञ्चण भारतीले केही सामुदायिक विद्यालयहरुको आन्तरिक स्रोत अपारदर्शिक भएको भन्दै त्यसको पनि खोजि गर्न सुझाव दिए ।
यस्तै करार शिक्षक नियुक्ति,विद्यालय व्यवस्थापन समिति गठनमा हुने झमेला र भौतिक पूर्वाधार निर्माणमा हुने अनियमिततालाई पनि रोक्नु पर्ने सुझाव दिए ।
कार्यक्रममा जिल्ला शिक्षा कार्यालय सुर्खेतका कर्मचारीहरु र जिल्ला स्थित पत्रकारहरुको सहभागिता रहेको थियो ।
