बजेट नसच्चिए सदन अवरुद्ध गर्ने काँग्रेसले सांसदको धम्की
सुर्खेत, असार ४ : कर्णाली प्रदेश सरकारले आर्थिक वर्ष २०८१/०८२ का लागि ल्याएको बजेट नसच्याएको खण्डमा सदन अवरुद्ध गर्ने धम्कीप्रमुख विपक्षी दल नेपाली काँग्रेसले दिएको छ ।
सरकारले ल्याएको आर्थिक वर्ष २०८१/०८२ को राजश्व र व्ययको वार्षिक अनुमान (बजेट)माथि प्रदेश सभामा भइरहेको छलफलको दोस्रो दिन मंगलबार सदनमा सरकारमा सहभागी मन्त्री एकातिर र बाँकी सांसदहरु अर्कैतिर भएको जस्तो भान भइरहेको थियो । मंगलबार सदनमा बोल्ने सत्तारुढ दलकै सांसदले समेतबजेटमा विचौलिया हावी भएको, बजेटलाई समानपमा वितरण नगरी सुर्खेत केन्द्रित गरेको भन्दै चर्को आलोचनासमेत गरेका थिए ।
प्रदेशसभाको बैठकमा नेपाली कांग्रेसका वेदराज सिंह, पूर्णबहादुर खत्री, घनश्याम भण्डारी, विजया बुढा, इन्द्राकुमारी शाही, लक्ष्मी सुनार, हिक्मतबहादुर बिष्टले बजेटको सामान्य छलफलमा भाग लिएका थिए । उनीहरुले सरकारले मनलाग्दी गरेको भन्दै बजेट निर्माणको आधार के हो भन्दै सरकारसँग जवाफ माग गरेका छन् ।
सांसद घनश्याम भण्डारीले पहुँचका आधारमा मुख्यमन्त्री र मन्त्रीका जिल्लामा बढी बजेट विनियोजन भएको बताए । उनले भने, ‘‘सुर्खेतका पालिकामा समेत बजेट विनियोजनमा धेरै अन्तर देखिएको छ । मान्छेको नाममै बजेट आएका योजनामा विचौलिया पुष्टि भएको छ ।’’ सत्तापक्षकै सांसदले विरोध गरेको बजेट आफूले पनि स्वीकार नगर्ने भण्डारीले बताए ।
एमालेका सांसद जीतबहादुर मल्लले बजेटका विरुद्ध मतदान गर्ने चेतावनी दिए । उनले जुम्ला, मुगु र कालिकोटमा आर्थिक मामिला तथा योजना मन्त्रालयबाट विनियोजन गरिएको बजेट र वीरेन्द्रनगरमा विनियोजन गरिएको बजेटको बारेमा ध्यानाकर्षण गराए ।
यसैगरी सांसद पूर्णबहादुर खत्रीले बजेटमा आफ्नो विरोध भएको बताउँदै बजेटमा सुधार भएन भने आफू बजेटको विरुद्धमा जाने उनले बताए । यसैगरी राप्रपाकी सांसद सन्तोषी शाहीले नीति तथा कार्यक्रम अनुसार बजेट नआएको भन्दै आपत्ति
जनाइन् । उनले पनि बजेट संशोधन गर्नुपर्ने बताइन् ।
यसैगरी जुम्कित लामा (कार्की), मिलन खड्का (रोका), दक्षिणा शाही, कृष्णबहादुर जि.सी., कलबहादुर हमाल, विन्दमान बिष्ट, राजकुमारशर्माले बजेट माथिको सामान्य छलफलमा भाग लिएका थिए ।
