प्रधानमन्त्री कार्यालयमा नयाँ संगठनात्मक संरचना
-( अब १७२ दरबन्दी कायम, दुई सचिव र एक सहसचिवसहित ६८ जनाको दरबन्दी कटौती
– मुख्य सचिवका अतिरिक्त प्रशासनतर्फ तीन, न्यायतर्फ एक सचिवको दरबन्दी कायम
– राष्ट्रिय तथ्यांक कार्यालयमा १११ दरबन्दी कटौती, साबिकका ३३ कार्यालय खारेज गरेर १८ नयाँ समन्वय कार्यालय स्थापना
प्रधानमन्त्री तथा मन्त्रिपरिषद् कार्यालयको संगठन तथा व्यवस्थापन सर्वेक्षण ९ओ एन्ड एम० स्वीकृत भएको छ । यससँगै कार्यालयमा कर्मचारीको दरबन्दी संरचना फेरबदल भएको छ ।
नयाँ संगठन संरचनाले दुई सचिव र एक सहसचिवसहित ६८ जनाको दरबन्दी कटौती भएको छ । अब कार्यालयमा एक सय ७२ जनाको दरबन्दी कायम गरिएको छ ।
डेढ महिनाअघि नै मन्त्रिपरिषद्ले संगठन संरचना स्वीकृत गरे पनि कार्यान्वयनको तहमा निर्णय भएर आएको थिएन । मन्त्रिपरिषद्बाट स्वीकृत भएबमोजिम निर्णय गरेर दरबन्दी संरचना अब कार्यान्वयनको तहमा आएको छ ।
स्वीकृत दरबन्दी संरचनाअनुसार अब कार्यालयमा चारजना सचिव ९विशिष्ट श्रेणी० को दरबन्दी हुनेछ । साबिकमा सात सचिवको दरबन्दी रहेकामा प्रशासनतर्फका दुई र इन्जिनियरिङतर्फको एकसहित तीन दरबन्दी कटौती भएको छ ।
साबिकमा कार्यालयमै कायम रहने गरेको राष्ट्रिय तथ्यांक कार्यालयको सचिवको दरबन्दी उतै मिलान गरिएको छ । साबिकमा कार्यालयको एक सचिवको दरबन्दी तथ्यांक कार्यालयको प्रमुख तथ्यांक अधिकारी पदमा मिलान गरिएकाले सचिवको कटौती भएको वास्तविक दरबन्दी संख्या दुई मात्र हुन गएको छ ।
यससँगै अब प्रधानमन्त्री तथा मन्त्रिपरिषद् कार्यालयमा मुख्य सचिवका अतिरिक्त प्रशासनतर्फ तीन, न्यायतर्फ एकजना सचिवको दरबन्दी कायम भएको छ ।
त्यस्तै, सहसचिव ९रापत्रांकित प्रथम श्रेणी० तर्फ १० जनाको दरबन्दी स्वीकृत भएको छ । साबिकमा प्रशासनतर्फ रहेका नौमध्ये दुईजनाको दरबन्दी काटिएको छ भने सूचना प्रविधितर्फ एकजनाको नयाँ दरबन्दी सिर्जना गरिएको छ । ओ एन्ड एमले सूचना प्रविधिको नयाँ महाशाखा थप गरेर त्यसका लागि सहसचिवको नयाँ दरबन्दी सिर्जना गरेको हो ।
त्यस्तै, उपसचिव ९राजपत्रांकित द्वितीय श्रेणी० तर्फ २८ जनाको दरबन्दी कायम गरिएको छ । साबिकमा ३० जनाको दरबन्दी रहेकामा प्रशासनतर्फ तीन दरबन्दी कटौती गरेर तथा इन्जिनियरिङ ९सिनियर डिभिजनल इन्जिनियर०को नयाँ दरबन्दी सिर्जना गरिएको छ ।
यसैगरी शाखा अधिकृततर्फ साबिकको ५५ जनाको दरबन्दीलाई ४३ मा सीमित गरिएको छ । यसभित्र अर्थशास्त्रीको नयाँ दरबन्दी सिर्जना गरिएको छ भने कम्प्युटर इन्जिनियरतर्फ दुई दरबन्दी थप गरिएको छ ।
प्रधानमन्त्री कार्यालयमा साबिकमा कायम रहेको दुई सय ३४ जनाको दरबन्दी अब एक सय ७२ मा झारिएको छ । यसभित्र ६८ दरबन्दी कटौती गरेर ६ दरबन्दी थप तथा नयाँ सिर्जना गरिएको छ ।
कार्यालयमा कर्मचारी दरबन्दी ठूलो भएको भन्दै आलोचना हुँदै आएको थियो । विगतमा गठन भएका विभिन्न आयोग तथा अध्ययन समितिहरूले पनि दरबन्दी घटाउन सुझाव र सिफारिस गर्दै आएका छन् ।
तथ्यांक कार्यालयमा १११ दरबन्दी कटौती
प्रधानमन्त्री कार्यालयअन्तर्गतकै राष्ट्रिय तथ्यांक कार्यालयमा एक सय ११ दरबन्दी कटौती भएको छ । मन्त्रिपरिषद्बाट स्वीकृत भएको नयाँ ओ एन्ड एमले कार्यालयको दरबन्दी सीमित गरेको हो । खारेज भएका यो दरबन्दी सहायकस्तरका हुन् ।
तथ्यांक कार्यालयअन्तर्गत साबिकमा विभिन्न ३३ जिल्लामा रहेका कार्यालय खारेज भएका छन् । ती कार्यालयमा तीन सय ८४ जनाको दरबन्दी कायम थियो ।
नयाँ संगठन संरचनाअनुसार अब प्रदेशगत रूपमा १८ वटा तथ्यांक समन्वय कार्यालय रहनेछन् । ती कार्यालयले समन्वय गर्नुपर्ने स्थानीय तह पनि किटान गरिएको छ । नयाँ संगठन संरचनाअनुसार अब कोशी प्रदेशमा मोरङ, इलाम र खोटाङमा गरेर तीन समन्वय कार्यालय रहनेछन् ।
मधेश प्रदेशको धनुषा र पर्सा तथा बागमतीमा मकवानपुर, काभ्रेपलाञ्चोक र काठमाडौंमा तथ्यांक समन्वय कार्यालय रहनेछन् । त्यस्तै, गण्डकीमा कास्की, गोरखा र बागलुङ, लुम्बिनीमा रूपन्देही, पाल्पा र दाङ, कर्णालीमा सुर्खेत र जुम्ला तथा सुदूरपश्चिममा कैलाली र डोटीमा तथ्यांक समन्वय कार्यालय रहनेछन् ।
चालू आव ०८०र८१ को बजेटले राष्ट्रिय तथ्यांक कार्यालयमातहत रहेका देशभरका जिल्ला तथ्यांक कार्यालय खारेज गर्ने घोषणा गरेको थियो । त्यसैबमोजिम साबिकका कार्यालय खारेज गरेर प्रादेशिक संरचनामा नयाँ कार्यालय सिर्जना गरिएको हो ।
