मप विश्वविद्यालयको स्ववियु निर्वाचन भदौ १२ गते हुने, निर्वाचन समितिको संयोजकमा अनन्तराज
सुर्खेत, भदौ ९ ।
मध्यपश्चिमाञ्चल विश्वविद्यालय सुर्खेतको स्वतन्त्र विद्यार्थी युनियन ९स्ववियु० को निर्वाचनको नयाँ मिति तय भएको छ । सुरुमा भदौ ८ गते निर्वाचन गर्ने गरी कार्यतालिका सार्वजनिक गरिएको भएपनि उक्त मिति मप विश्वविद्यालय कार्यकारी परिषद्ले विद्यार्थीहरुलाई जनाकारी नै नदिएर परिवर्तन गरेपछि विद्यार्थी संगठनहरुले विरोध जनाएका थिए ।
८ गते नै निर्वाचन हुनुपर्ने भन्दै विद्यार्थी संगठनहरुले १३ गतेको मितिमा हुने निर्वाचनमा सहभागी नहुने बताएपछि विश्वविदालयले नयाँ मिति घोषणा गरेको हो । विश्वविद्यालयका पदाधिकारीहरुले भदौ १३ गते तोकेको निर्वाचनको मितिमा मुख्य विद्यार्थी संगठनहरु चुनावमा सहभागी नहुने भएपछि १२ गते निर्वाचन गर्ने सहमति गरेको हो ।
विश्वविद्यालयका पदाधिकारीहरु र विद्यार्थी संगठनहरुबीचको पटकपटकको बार्तापछि यो सहमति भएको हो । विश्वविद्यानलयले निर्वाचनको मिति सारेपछि विद्यार्थी संगठनहरु नै विभाजित भएका थिए । विद्यार्थी संगठनहरु नै विभाजित भएको र निर्वाचन समितिका संयोजकले समेत राजिनामा दिएको अवस्थामा अन्योलमा परेको निर्वाचन अब १२ गते नै हुने पक्का भएको छ ।
यस अघि ८ गते निर्वाचन गर्नका लागि गठन गरिएको निर्वाचन समितिका संयोजक पूर्व डीन गणेशबहादुर कार्कीले निर्वाचन गराउन नसकि राजिनामा दिएपछि विश्वविद्यालयले निर्वाचन समिति पनि बुधबार नयाँ बनाएको छ । नयाँ निर्वाचन समिति इन्जिनियरिङ संकायका निमित्त डीन अनन्तराज घिमिरेको संयोजकत्वमा गठन गरिएको छ ।
जसको सदस्य सचिवमा मानविकि तथा सामाजिकशास्त्र महाविद्यालयका क्याम्पस प्रमुख आनन्द सुवेदी, सदस्यहरुमा शिक्षा शास्त्र महाविद्यालयका क्याम्पस प्रमुख लक्ष्मीप्रसाद आचार्य चयन भएका छन् । यस्तै सदस्यहरुमा अमृत शर्मा (गैरे), विक्रम खड्का र कृष्णप्रसाद चपाई पनि रहेको विश्वविद्यालयका सूचना अधिकारी विष्णुबहादुर खड्काले जानकारी दिए । नयाँ मिति र नयाँ निर्वाचन मिति तय भएपछि कार्यतालिका पनि नयाँ हुने भएको छ ।
यस अघि मध्यपश्चिमाञ्चल विश्वविद्यालयको स्वतन्त्र विद्यार्थी युनियनको निर्वाचनको विषयलाई लिएर विश्वविद्यालयका रजिष्ट्रार डा. महेन्द्रकुमार मल्लको अध्यक्षतामा विश्वविद्यालयमा क्रियाशील विद्यार्थी संघ–संगठनका केन्द्रीय नेतृत्वसंगको बैठक सम्पन्न भएको थियो र बैठकमा नेक्राविसंघका केन्द्रीय अध्यक्ष निरज लवजु, अनेरास्ववियुका केन्द्रीय उपाध्यक्ष सुनिता बराल, अनेरास्ववियु (क्रान्तिकारी) का केन्द्रीय उपाध्यक्ष गंगाराम तिमिल्सिना र पन्चा सिंह, नेपाल विद्यार्थी संघका केन्द्रीय महामन्त्री सरोज कुमार थापा, अनेरास्ववियुका केन्द्रीय महासचिव ऐन महर, अनेरास्ववियु (क्रान्तिकारी) का केन्द्रीय सचिव राम बहादुर बि.क., अखिल (क्रान्तिकारी) का सचिवालय सदस्य भिष्मकुमार शाही, र प्रकाश शाही, नयाँ शक्ति विद्यार्थी युनियनका सचिवालय सदस्य एवम प्रदेश नं. ६ का संयोजक टंकप्रसाद धमला, नेविसंघका केन्द्रीय सदस्य अनिल कुमार शाही, नेक्राविसंघका केन्द्रीय सदस्य कुमारबिक्रम शाही, अनेरास्ववियु (छैठौ) का केन्द्रीय सदस्य हस्तराज रेग्मी लगायतको सहभागिता रहेको थियो ।
