कर्णाली प्रदेशमा कोरोना संक्रमित १२२४ पुगे

कर्णाली प्रदेशमा बिहीबार मात्रै एक सय २० जना कोरोना भाइरस संक्रमित थपिएका छन् । प्रदेश अस्पताल सुर्खेत/पशुपछी अन्वेषण प्रयोगशाला सुर्खेतमा गरिएको परीक्षणमा एक सय २० जनामा कोरोना संक्रमण पुष्टि भएको हो ।

परीक्षणमा दैलेखका ८६ जना र सुर्खेतका ३४ जनामा कोरोना संक्रमण पुष्टि भएको कर्णाली प्रदेश सामाजिक विकास मन्त्रालय स्वास्थ्य महाशाखा प्रमुख डा. लक्ष्मीनारायण तिवारीले बताए । योसँगै कर्णालीमा कोरोना संक्रमितको संख्या एक हजार दुई सय २४ पुगेको छ ।

कर्णाली प्रदेशमा पछिल्लो समय दैलेख महावै गाउँपालिकाको आइसोलेसनमा रहेका ६ जना, सुर्खेत सालकोट आइसोलेनसनका तीनजना, दैलेख अस्पतालका एकजना, सुर्खेत आइसोलेसन सेन्टरका एकजना कोरोना जितेर घर फर्किएको प्रमुख डा. तिवारीले बताए ।

कर्णालीमा हालसम्म कोरोना जितेर घर फर्कनेको संख्या पाँच सय पाँच भएको महाशाखाले जनाएको छ । यस्तै, सुर्खेतको सिम्ला गाउँपालिका–८ मा आत्महत्या गरेकी महिलामा पनि कोरोना पुष्टि भएको र कर्णालीमा कारोनाका कारण चारजनाले ज्यान गुमाइसकेका छन् ।