यातायात सेवा कार्यालय विस्तार

सुर्खेत । सुर्खेतस्थित यातायात कार्यालयले आफ्नो सेवा विस्तार गरेको छ । यसअघि सामान्य सेवा प्रदान गर्दै आएको कार्यालयले आज (बुधबार)देखि सवारी चालक अनुमति पत्र बाहेक सम्पूर्ण सेवा प्रदान गर्ने भएको छ ।

२०७५ साल साउन १ गते कर्णाली प्रदेश सरकार मातहत आएको उक्त कार्यालयले आज (बुधबार)देखि औपचारिक रुपमा व्यवस्था कार्यालयको रुपमा सेवा सुचारु गर्ने कार्यालय प्रमुख सुनिल लिम्बुले जानकारी दिए ।

कार्यालयले रुट परमिट , सवारी साधन कर , नामसारी, दर्ता, जाँच पासलगायत यातायात सेवा कार्यालय विस्तार गर्दै सेवा दिनेछ । कर्मचारी अभावले सवारी लाइसेन्स भने तत्काल जारी गर्न नसकिने प्रमुख लिम्बुले जानकारी दिए ।

उनका अनुसार कर्मचारी अभावले चालक अनुमति पत्रको काम तत्काल सुरु हुन नसकेको हो । यसअघि ८ जना कर्मचारीको दरबन्दी रहेको कार्यलयमा सेवा विस्तार भएसँगै १५ जना कर्मचारीको दरबन्दी स्वीकृत भएको छ ।

यसैबीच, यातायात सेवा कार्यालय, सुर्खेतले आर्थिक वर्ष २०७५ ÷७६ मा ९ करोड ७१ लाख राजस्व सङ्कलन गरेको जनाएको छ । यो पहिलेको तुलनामा २० प्रतिशतले बृद्धि भएको कार्यालयको भनाइ छ ।