नक्कली फेसबुक आतंक, मन्त्री देखि मेयरसम्म आजित
सुर्खेत ।
कर्णाली प्रदेशमा नक्कली फेसबुक आतंक चलिरहेको पाइएको छ । प्रदेश सरकारका प्रभावशाली मन्त्री देखी नगरपालिकाका प्रमुखसम्मलाई नक्कली फेसबुक खाताका कारण तनाव झेल्नु परेको पाइएको छ ।
प्रदेश सरकारका आन्तरिक मामिला तथा कानून मन्त्री नरेश भण्डारीको प्रोफाईल तस्विर प्रयोग गरेर कुनै अपरिचित व्यक्तिले नयाँ खाता खोलेको पाइएको छ । यस्तै आठबीस नगरपालिका दैलेखका नगर प्रमुख खड्गराज उपाध्यायले पनि यस्तै सास्ती खेप्नु परेको पाइएको हो । ‘हामीले मन्त्री भण्डारीको नक्कली फेसबुक खाता खोलेको पत्ता लगाएका छौं ।’
मन्त्रीका स्वकीय सचिव विमल थापा भन्छन्, ‘उक्त व्यक्तिको खोजी कार्य भइरहेको छ ।’ मन्त्री भण्डारी कर्णालीको समग्र सुरक्षा व्यवस्था हेर्ने जिम्मा पाएका मन्त्री समेत हुन ।
यता, उक्त खाता भने अहिले हटाइसकेको मन्त्री भण्डारीको भनाइ छ । ‘मेरो नाममा खाता खोलेर रिक्वेस्ट पठाउने काम भइरहेको रहेछ ।’ मन्त्री भण्डारीले भने, ‘तर अहिले खाता हटाइसकिएको छ । उक्त ब्यक्तिको खोजी कार्य भने जारी नै छ ।’
आठबीस नगरप्रमुख उपाध्यायको नाउँमा रहेको अर्को खाता अहिले पनि चालु अवस्थामा नै रहेको पाइएको छ । ‘मैले प्रहरीलाई तथा अन्य आफ्न्तलाई खाता सञ्चालक को हो भन्ने बारेमा जानकारी संकलन गर्न भनेको छु ।’ उनी भन्छन्, ‘त्यसपछि आवश्यक कानूनी कारवाहीतर्फ म लाग्नेछु ।’
